A do ketë një pistë tjetër apo një kthesë në hetime pas zbulimeve të provave të reja?
Detaje dhe prova të reja dalin në dritë nga sherri i së enjtes së 4 tetorit në zonën e Bllokut që përfundoi me eliminimin e 28-vjeçarit Fabian Gaxha dhe plagosjen e dy të tjerëve në një konflikt me të dashurin e këngëtares Elvana Gjata dhe miq të tij.
Megjithëse nuk ka qenë e qartë masa e përfshirjes në ngjarje e këngëtares pasi u tha se ajo ishte larguar sapo kishte nisur sherri, burime të sigurta bënë me dije se Elvana ka hyrë brenda lokalit dy herë.
Kanë qenë kamerat e një biznesi pranë vendit të ngjarjes që kanë regjistruar këngëtaren dhe në momentin e ngacmimit dhe më pas kur ajo ka shkuar dy herë brenda, me sa duket për t’i thënë të dashurit të saj Ervin Mata të largohej e të mos priste Ervis Martinajn për sqarime.
Ndërkohë ditën e djeshme u bë e ditur se Prokuroria ka urdhëruar shoqërimin e detyrueshëm të këngëtares, e cila ishte në lokalin ku ndodhi ngjarja. Shpallja në kërkim policor e detyron Gjatën që të paraqitet për të dhënë shpjegime brenda 30 ditëve kalendarike, pasi duhej të jepë deklarimet e saj për ngjarjen.
Këngëtarja u largua nga Shqipëria më 5 tetor, vetëm pak orë pas ngjarjes nga Rinasi drejt një vendi të Bashkimit Europian.
Në kërkim për ngjarjen janë shpallur dhe i dashuri i saj Ervin Mata, Fabian Allushi, Mevjol Bilo, të cilët kanë qenë të ulur në një tavolinë sëbashku.
