Të paktën 37 persona kanë vdekur nga një zjarr që ka përfshirë një qendër tregtare në Rusi.
Ndërkohë raportohet edhe për 70 persona të zhdukur, 40 prej të cilëve janë fëmijë.
Sipas mediave zjarri nisi brenda qendrës tregtare në një zonë për fëmijë dhe u përhap me shpejtësi në të gjithë ndërtesën.
Tragjedia ka ndodhur në qytetin e Kemerovës, ndërsa forcat e shpëtimit vazhdojnë kërkimet në qendrën tregtare.
Mediet raportojnë se 11 prej viktimave janë fëmijë, shkruan CNN, përcjell Telegrafi.
Zjarri shpërtheu në një hapësirë të madhe të qendrës tregtare që shërbente si kënd lojërash edhe për fëmijët.
Zjarrfikësit arritën të shpëtonin 120 persona, tha ekipi i emergjencave rajonale.
Ndërkaq, Tass njoftoi se zjarri në Vishnya Zimnyaya – e njohur edhe si Qendra Tregtare e Dimrit në Qendrën Kemerovë shpërtheu në katin e fundit të ndërtesës katërkatëshe dhe përfshiu me shpejtësi një sipërfaqe prej rreth 1,600 metrash.
Raportohet se instalimi i dobët i rrymës ishte shkaktari që solli në tragjedinë vdekjeprurëse.
Qendra tregtare, e cila u hap në 2013, ka një kinema, një kopsht zoologjik, një qendër për fëmijë dhe një bowling.
